مش لاقى كلام يوصف اللى انا فيه
منين أجيب كلام اقوله و اعبّر بيه
أنا مصدوم وقلبى حزين
أنا كلى ألم وحزن وأنين
مش عارف أعبر بايه
واتكلم و احكى عن ايه
سمعت خبر انتقالك وانا مذهول
والاخبار فى كل القنوات بتقول
انك سبت الارض ورحت السما
ومصر حزينة من فراقك متالمة
ليه يا سيدنا سبتنا ليه؟
يعنى الخبر دا صحيح
سابنا البابا وراح للمسيح
قلوبنا علي فراقه موجوعة
وصرخة فى ارض مصر مسموعة
من بعدك يا ابونا هنعمل ايه؟
ياما فى وعظاتك علمتنا
وف كل لقاءاتك فهمتنا
وبكل اقوالك ادهشتنا
بموهبة من رب المجد
اللى انت عايش ليه
كنت منارة فى العلم والايمان
كنت مثال ف المحبة والسلام كمان
شهد لحكمتك ولعلمك كل انسان
قابلك واتكلمت ليه
لكن عزانا انك ف السما فرحان
مع الهك القدير رب الاكوان
مع كل القديسين اللى عاشوا زمان
واكليل سماوى متزين بيه
هنفضل فاكرينك صوت وصورة
كلماتك هتفضل فى عقولنا محفورة
دايما بتردد كله للخير و ربنا موجود
مسيرها تنتهى والمجد ليه يعود
دا اللى كنت بتؤمن بيه
هنعيش بكلامك كانك وسطينا
دا كلام الهنا اللى عايش فينا
ورجائنا نشوفك ف السما عند فادينا
رب المجد يسوع اللى وهب حياته لينا
ساعتها هنفرح كلنا معاك
ونعيش الابدية حواليه
